Alitu di Diu (poesia di Nino Barone)

Mi susu e mentri aspettu sulamenti

lu celu chi s'allustra e chi giarnìa,

ascutu, comu fussi na puisìa,

lu duci ciatu di li me' nuzzenti.

La musica chi sentu m'arricrìa,

mi fa vulari pi li cuntinenti,

liggeru, chiù liggeru di la menti,

dunni l'amuri poi si fa magìa.

Na sveglia sona e rumpi lu me viaggiu

nta st'universu nfutu ch'è l'amuri

chi mi stracancia 'n sanu lu bulìu!

Lu suli duna già lu primu raggiu

e nesciu a travagghiari e li me' uri

sunnu assuppati d'àlitu di Diu!