L'urtimu falò (didicata a me patri)

23.07.2020

E passu lu me tempu a ricurdari

li voti chi me patri mi purtava

a lu paisi di Casteddammari:

iu ddocu, mi dicia, nascivi e stava!


E mentri s'accania nta lu cuntari

un focu malinconicu abbruciava

ntra li so' occhi, ntra lu so parrari!

M'arresta la so vuci chi cuntava


li stori eterni di la picciuttanza,

li so' silenzi, ddocu mi mparau

a nun jittari nenti a sanfasò!


Ora ddu focu morsi, la so danza

si l'agghiuttiu lu ventu c'astutau

pi junta puru l'urtimu faló!


Nino Barone 

Ultimi libri dell'autore: Amor ti tocco - Sonetti in lingua italiana /  Processione dei Misteri -Cronache e Memorie / La lingua di Koinè - Appunti di Scrittura e Parlata Siciliana / I misteri di una processione